Monday, March 15, 2010

తెలంగాణ ఉగాది శుభాకాంక్షలు!!

తెలంగాణ ప్రేమికులకు... అభిమానులకు...ప్రజలకు...కవులకు..కళాకారులకు..మేధావులకు..ప్రవాస తెలంగాణీయులకు..ప్రవాస ఆంద్రులకు..ప్రవాస భారతీయులకు..మేధావులకు అన్ని తెలంగాణ సాధన కార్యాచరణ సమితి లకు వికృతి ఉగాది శుభాకాంక్షలు!!

రాబోయే “ఖర”నామ ఉగాదిని ఖరారుగా ఖరాఖండిగా శ్రీకరముగా మన తెలంగాణా రాష్ట్రం లోనే జరుపుకోగలమని విశ్వసిస్తూ..దైవాన్ని ప్రార్థిస్తున్నాను

Sunday, March 14, 2010

అటు ఉగాది ఉషస్సు-ఇటు నిశీధి తమస్సు

అటు ఉగాది ఉషస్సు-ఇటు నిశీధి తమస్సు
వయ్యారాలు పోతూ-వగలొలుకబోస్తూ
రాజకుమారిలా వేంచేసి-
ఆంధ్ర భవన ద్వారాలు తెఱుస్తుంది వసంత లక్ష్మి!
దర్జాగా వస్తుంది ఉగాది ఓ క’వి కృతి’ గా!!

కృంగిన దేహంతో-కృశించిన ఆరోగ్యంతో
అయినవారే కొఱగాని వారై
అంధకార కారాగారంలో బంధీ-తెలంగాణ తల్లి!
ఎలావస్తుంది నిజమైన ఉగాది
ఎంతకూ ముగియదు కదా ఈ నిశీధి
వస్తుంది “విరోధి”కి తోడు మరో కాపలాదారు
ఒక ” వికృతి” గా !!
కోనసీమలు కొబ్బరాకులు
నూజివీడు రసాలు అరటి గెలలు
పంటపొలాల్లో పారే
కృష్ణా గోదావరి జలాలు!
పండిన ధాన్య రాశులు-నిండిన ధాన్యాగారాలు!!
అటు ఉగాది –అంతటా ప్రమోది

బీడు నేలలు -మోడు బ్రతుకులు
పాలమూరు కూలీలు-ఫ్లోరైడు బాధితులు
రైతు ఆత్మహత్యలు-తను నేసిన చీరతోనె నేతన్నల ఉరి చావులు
కనుకొలుకుల్లో సైతం అడుగంటిన నీరు
చుక్కనీరు లేకుండా అడుగుకో బోరు
ఎండిన చేనుల్లో ఎండ్రిన్ డబ్బాలు
మండిన గుండెల్లో ఉంటాయా పబ్బాలు
ఇటు ఉగాది- ఇంటింటా సమాధి

పంచ భక్ష్యాలతో ఆరగింపులు
అయిదు రుచులతో ఆకలికై వగ’చేదే’ లేని విందులు
బ్రతుకు పట్ల దిగులు లేని పంచాంగ శ్రవణాలు- కవి సమ్మేళనాలు
పచ్చదనం రాజ్యమేలుతుంటె పాడక ఛస్తుందా కోకిల మాత్రం!!
అటు ఉగాది-జన వినోది
గంజినీళ్ళు గట్కకూడు జొన్నలతో అంబలి రొట్టెలు
అయిదు రుచులు ఆంధ్ర సొంతమైతే
రుచుల మాట దేవుడెఱుగు ఆకలికై అర్రులు చాస్తూ
అరి’చేదంతా’ మన వంతైంది
మారని గ్రహచారాలు తొలగని పీడలు
ఏ పంచాంగాలు మార్చేను మన జాతకాలు?ఉంటే గింటే ఉద్యమ జాగృతాలు
ఎన్ కౌంటర్ల మిధ్య-బలిదానాల మధ్య
వినిపిస్తే గిస్తే రాబందుల గాత్రం!!
ఇటు ఉగాది-చితుల విబూది
అంతతనాలు-రాద్ధాంతాలు
పొమ్మని ఉమ్మేసినా తుడిపేసుకొనే రకాలు
మెడబట్టుక దొబ్బినా చూరుకు వేళ్లాడుతారు
మెజారిటీ తమదేనను అహంభావ విభవాలు
అందుకే అటు ఉగాది
చమత్కృతి భరిత ఓ క”వి’కృతి’”
ఆరని ఉద్యమాలు-ఆగనిపోరులు
ప్రాణాలు ఫణంపెట్టి తెలంగాణ రణాలు
కన్నతల్లి రొమ్ముదన్ను నీచులైన కీచకుల వెలి వేసి
ఎక్కిన కొమ్మను నరుక్కొనే నిజమైన మూర్ఖ రాజకీయుల వదిలేసి
నాల్గు కోట్ల ప్రాణాలు త్యజించైనా
అయిదు కోట్ల హృదయాలు హరించైనా
తొలగించాలి ఈ సుదీర్ఘ నిశీధి
అంతవరకు ఇటు ఉగాది
ఆత్మగౌరవ మృతి సహిత ఒక “వికృతి”

Tuesday, March 9, 2010

నా తెలంగాణ-రతనాల మౌనవీణ

తెల్లారి పోయింది తెలంగాణ భవితవ్యం
చల్లారిపోయింది ఎగసి పడిన ఉద్యమం
అమ్ముడై పోయినారు అతిరథులెందరో
కొమ్ముకాస్తున్నారు ప్రత్యర్థుల కెందరో
ఎలా సంభవిస్తుంది నా తెలంగాణ
ఎప్పుడు నినదిస్తుందీ రతనాల వీణ
1. తాతలు తాగిన నేతుల సంగతి
నెమరు వేయుటెనా మన సంస్కృతి
బలిదానంచేసిన నేతల సంస్మృతి
వల్లించడమేనా తెలంగాణ ప్రకృతి
బీరాలు పలికినారు ఆరంభ శూరుల్లా
బీరువులై పోయినారు చచ్చు పిరికి పందల్లా
ఎలా సంభవిస్తుంది నా తెలంగాణ
ఎప్పుడు నినదిస్తుందీ రతనాల వీణ

2. చదరంగపు పావులుగా విద్యార్థులు బలైనారు
వైకుంఠపాళి కేళి విషనాగుల చిక్కినారు
ఎలాపోల్చుదామన్నా తక్కువౌను ఉపమానం
రాజకీయాల్లొ లేవు సిగ్గు లజ్జ అభిమానం
తోకముడిచినారు ఏజాతికి చెందనోళ్లై
సొల్లుకార్చుకొన్నారు ఏ నీతికి అందనోళ్లై
ఎలా సంభవిస్తుంది నా తెలంగాణ
ఎప్పుడు నినదిస్తుందీ రతనాల వీణ

తెలంగాణ తల్లి

కడుపుచించుకొని కన్నది-తెలంగాణ తల్లి
అందుకు చేయాలి -వందనాలు మోకరిల్లి
అమ్మచెఱను వదిలించే –దాకసాగాలి లొల్లి
రక్కైనా చంపుతుంది-ఎదురుతిరిగితే పిల్లి

1. ఉండటానికై గుండెలొ చోటిచ్చింది
బ్రతకడానికై నీకై -బ్రతుకు ధారపోసింది
తార్చకండి తమ్ములార అమ్మను కలనైన
తెగటార్చకండి నేతలార-విలువలనికనైనా

2. సిగ్గుచేటు మనకు మనమె సిగపట్లు పట్టుకుంటె
పండగే సీమాంధ్రకు మనలొ మనం కొట్టుకుంటె
తుమ్మితె ఊడే ముక్కులు మీకిచ్చిన పదవులు
నమ్మితె ప్రాణాలిస్తరు తెలంగాణ ప్రజలు

3. ఉద్యమాన్ని నీరుగార్చె కుట్రలు గమనించండి
తెలంగాణ ప్రజల మధ్య చిచ్చును రగిలించకండి
బెదిరింపులకెప్పుడూ జడిసి తోకముడవకండి
మీకుమీరె వెలకట్టి అమ్ముడై పోకండి

4. శ్రీకృష్ణ సందేశం తెలంగాణ ఇప్పించదు
సీమాంధ్ర మనకెప్పుడు వేర్పాటు తెప్పించదు
కలగన్న రోజొక్కటి మనముందుకు వస్తుంది
నాల్గుకోట్ల గుండెలసడి తెలంగాణ తెస్తుంది
మన నాల్గుకోట్ల గుండెలసడి తెలంగాణ తెస్తుంది

Saturday, February 20, 2010

తెలంగాణ సాధనే- సదా నీ ప్రధానమై

సాగిపో యేటి సంగీతమై
సాగిపో ఎదుగు సూర్య బింబమై
సాగిపో ఆశయాల అంబరాలు గమ్యమై
సాగిపో సాగిపో సాగిపో || సాగిపో||
1. అదురులేక బెదురులేక వడివడిగా సాగిపో
ఒడుదుడుకులు ఎదురైనా అధిగమించి సాగిపో
పంజరాలు బంధనాలు శృంఖలాలు త్రెంచుకొని
సాచిన రెక్కల స్వేఛ్ఛా విహంగ భంగి ఎగిరిపో || సాగిపో||

2. నిరాశా చీకట్లను ఛెండాడుతు సాగిపో
నిరోధాల మబ్బులనిక ఛేదించుక సాగిపో
గ్రహణాలు మరణాలు కారణాలు ఎదిరించి
అపరాహ్ణ గ్రీష్మకారు భానుడిలా రగిలిపో || సాగిపో||

3. భగీరథుడి మనోరథపు చెదరని సంకల్పమై
ఏకలవ్య హృదయాంతర నిశ్చల ఏకాగ్రతై
శ్రమఏవ జయమన్నది సదా నీ నినాదమై
తెలంగాణ సాధనే- సదా నీ ప్రధానమై || సాగిపో||

Saturday, February 13, 2010

గీతోపదేశం-శ్రీకృష్ణ సందేశం

గీతోపదేశం-శ్రీకృష్ణ సందేశం
పోరునాప మనలేదు-వెన్నుచూప మనలేదు
సాగించు వీరుడా కడదాకా రణం
తెలంగాణ సాధన-దా-కా-రణం
జై తెలంగాణ! జైజై తెలంగాణా!!
1. తన పర ఎవరనేది ఎంచకు
యుద్ధంలో అడ్డొస్తే మన్నించకు
యాచించుటకిది కాదు ఒకరు వేయు భిక్షం
ప్రాణాలు ఫణం పెట్టి సాధించు నీ లక్ష్యం
2. మన పరిధిలొ ఉండదు ఏ ఫలితం
నిర్వహించు అనుక్షణం నీ కర్తవ్యం
పూరించు బిగబట్టి సమర శంఖం
ప్రత్యర్థుల గుండెల్లో సడలాలి బింకం
3. కుట్రలు కుతంత్రాలు సాధారణం
మాయోపాయాల వ్యూహాలే కదా రణం
యోధుడికిల ఎప్పుడూ ఉండబోదు మరణం
కోట్లమంది త్యాగమే మనకిక శరణం
తెలంగాణ రాష్ట్రమే విజయ తార్కాణం

Thursday, February 4, 2010

రాజీనామా చేయండి చపల చిత్తులారా!

మా నెత్తుటి చుక్కలనే విత్తనాలు పాతండి
మొలకెత్తే తెలంగాణ చెట్టు పళ్ల కెగబడండి
రాజకీయ పక్షాల నేతలారా
నరమాంస భక్షకుల దూతలారా
మా శవాలపై పేలాలేరుకొని తినగరండి
మీ పదవీ లాలసలో మనుషులనీ మరచిపొండి

1. పదవీ అధికారం ఇచ్చింది ఈ ప్రజలేగా
ఓటేసి ఎన్నుకుంది తెలంగాణ జనమేగా
ప్రజాభీష్టమే మీరు కాలరాస్తే
తాత్కాలిక హంగులకై ప్రాకులాడితే
ఇచ్చిన అధికారం తిరిగి తీసుకోనుగలరు
ఎక్కించిన మీ గద్దెను ఎలాగైన దించగలరు
కళ్ళిక తెఱవండి కపట నాయకులారా
రాజీనామా చేయండి చపల చిత్తులారా
2. రంగుల జండాలిక పక్కన బెట్టండి
తెలంగాణ సాధనకై తెగువ చూపి కదలండి
విద్యార్థుల పోరుబాట విధిగా ఇక సాగండి
ఉద్యమాన యువతతో చేయిచేయి కలపండి
తెలంగాణ గడ్డమీద నిజంగా పుట్టారా
అమ్మానాన్నలకైన తలకొరివి పెట్టేరా
కళ్ళిక తెఱవండి కపట నాయకులారా
రాజీనామా చేయండి చపల చిత్తులారా

Tuesday, February 2, 2010

పాదాక్రాంతం నీకు జయం

నేర్పుతుంది జీవితమే
అనుక్షణం కొత్త పాఠమే
ఓడిపోతుంది ఒకనాడు ఓటమే
ఓర్పుతో సాధిస్తే వరించేను విజయమే
1. అద్భుతాలు జరిగి ఎవ్వరూ- కాలేదు గొప్పవారు
అదృష్టం నమ్ముకొని అవలేదు-మహానీయులు
ఇటుక మీద ఇటుక పేర్చి -కడితేనే మేడగ మారు
పునాదియే పటిష్టమైతే –కట్టడాలు కడతేఱు
2. నిద్రలేమి రాత్రులెన్నో- గడిపారు కీర్తి చంద్రులు
సాధనయే ఊపిరిగా- సాగారు లక్ష్య పథికులు
పక్కదోవ పట్టలేదు –ఎన్నడైనా విజేతలు
ధ్యేయాన్ని మరువలేదు –కలనైనా జిష్ణువులు
3. భగీరథుని సంకల్పం-అవ్వాలీ నీకభిమతం
సడలని విక్రమార్కుని-పట్టుదలే నీకాదర్శం
ఏకలవ్యు నేకాగ్రతయే- ఎప్పటికీ నీకు హితం
అభిమన్యుని విక్రమతే-సదా నీకు ప్రామాణ్యం
4. ఆత్మహత్య ఎలాచూసినా-అవమానం అతిహేయం
కన్నవారి గుండెకోత- అసమానం దయనీయం
సంపూర్ణ ఆయుర్దాయం-సర్వులకిల అనుభవనీయం
ప్రయత్నిస్తె ఎన్నటికైనా-పాదాక్రాంతం నీకు జయం

Sunday, January 31, 2010

అప్పుడూ ఇప్పుడూ ఎప్పుడూ -తెలంగాణం మా ప్రాణం

తెలంగాణా తెచ్చువారికి
వేయకుంటే ఓటు
మార్చలేరెవ్వరూ
గ్రహపాటు

ఆచితూచి వెయ్యరా
నీ విలువైన ఓటు
’తెలంగాణా’
మరచిపోతే చేటు

మంచి తరుణం
మించనీకు
తెలంగాణా సాధనకు
ఓటే బ్రహ్మాస్త్రం నీకు

మహాకూటమి
పొందితే ఓటమి
తొలగదు లేమి
తెలంగాణా ఎండమావి?!

చేతి లో
తెలంగాణా చూపెట్టి
సంక నాకించేట్టి
వారినోడించు పట్టుబట్టి


తెప్పతగలేస్తే
ఆడితప్పేస్తే
ఇల్లలికేస్తే
పండగౌనా కన్నెర్రజేస్తే

కడుపుల్లేంది
కావలిస్తే వస్తుందా?
కుటిల కాంగ్రేస్
తెలంగాణా ఇస్తుందా ???!!!!!!!!!!!!


తెలంగాణ
నాడు మౌన వీణ
నేడు దశదిశల
మారు మ్రోగే రుద్రవీణ

ఉక్కుపాదాలకింద
తెలంగాణా
నవాబులు దొరలు ఆంధ్రుల
కారణాన

వెయ్యేళ్లకైనా
వేరుతప్పదు
ఇక ప్రత్యేక తెలంగాణా
పోరుతప్పదు

తెలంగాణా
ఉద్యమాల ఖజానా
త్యాగధనుల
చిరునామా

తెలంగాణా
కాదెవరి దయాభిక్ష
ఈడి అణగారిన
ప్రజల ఆకాంక్ష

ఆంధ్రులు మేధావులు?!
బత్కనేర్చిన జీవులు
చంకెక్కి నెత్తెక్కే
స్వభావులు

ఇది మా తెలంగాణా
బతుకనివ్వండి
స్వేచ్ఛగా
మమ్ము మా మానాన

తేల్చుకోలేమంటే
చావోరేవో
నువ్వసలు
తెలంగాణావాడివే కావో

ఏకులై వస్తారు
మేకులై ఉంటారు
ఆంగ్లేయుకేం తీసిపోరు
ఆంధ్రులు!


ఎన్నాళ్లీ వివక్ష
తెలంగాణాపై
మొసలి కన్నీళ్లే
ప్రభుత సమీక్ష

అటో కాలు ఇటోకాలు
తెరాస నాటకాలు
తెలంగాణాకు
తిలోదకాలు?!

తుఫాను ముందటి ప్రశాంతి

కోట్లమంది కోర్కె తెలంగాణయని తెలుసుకో
పాతిపెడ్తె విప్లవాలు మొలుస్తాయి కాచుకో
తుఫాను ముందుశాంతిదని వెంటనే గ్రహించుకో
రాకూడని యుద్ధానికి రాయబారమిది యనుకో
జై తెలంగాణ!జైజై తెలంగాణా
1. కోట్లమంది ప్రాణాల బేరానికి సరే సరే
హైద్రాబాద్ వదలకుంటె ఎంతకైన తయారే
భాగ్యనగరు లేకుండా తెలంగాణ శవతుల్యం
కోరుకోండి కేంద్రాన్ని అందుకై తగు మూల్యం
2. వక్రభాష్యాలు చెబితె వినుటకెవరు లేరిక్కడ
దొంగలెక్క చిట్టాలు విప్పుటయే తగదిక్కడ
గతంలోని ఆంధ్ర రాష్ట్ర హద్దులకే సిద్ధపడి
అనుబంధం మిగలనీండి అందుకైన తృప్తిపడి

Wednesday, January 20, 2010

కుక్కతోక

కుక్కతోక పట్టుకొని గోదారి దాటలేము
పిఱికిపంద నావికులతొ తీరాన్ని చేరలేము
స్వార్థపూరిత నేతలతో తెలంగణ తేలేము
నమ్మి వెంట నడిచామా శవాలై తేలేము
కళ్ళుతెరువు తమ్ముడా కుళ్ళుజోలి కెళ్లబోకు
బ్రతుకు తెఱువు లేదేమని కుళ్లికుళ్ళి ఏడ్వబోకు
తెలంగాణ రాదేమని నిన్ను నువ్వు చంపుకోకు
1.చిత్తశుద్ది అంటేనే అర్థమే తెలియదు
ఆడినమాటకు కట్టుబడుట తెలియదు
తీయనైన మాటలతో పబ్బాన్ని గడుపుతారు
అవకాశవాదంతో అందలమెక్కుతారు- మనసొమ్ము మెక్కుతారు
ఎఱిగిమెలుగు తమ్ముడా-ఎదురు నీకు లేదురా
దుష్టశక్తులెదురైనా- నీవు బెదర బోకురా
2.ఏ ఎండ కా గొడుగు- పట్టుటలో నేర్పరులు
రెండేసి పడవల్లో- కాళ్ళుంచు సమర్థులు
మాటమార్చు విద్యలో-వీరికెవరు సాటిరారు
వెన్నుపోటు పొడుచుటలో వీరికెవరు దీటురారు
తెగువ చూపు తమ్ముడా-తెలంగాణ నీదిరా
ప్రజలె నీకు తోడురా-భవితలోకి సాగరా
జై తెలంగాణా! జైజై తెలంగానా!!

Tuesday, January 19, 2010

ఆత్మత్యాగం

నేలకొరిగిన వీరులారా!వందనం వందనం
తలలు తెగిన తమ్ములారా అందుకోండి మా సలాం
తెలంగాణా బిడ్డలారా! మీకు అశ్రుల తర్పణం
తెలంగాణా సాధించగ మేము సైతం అర్పణం

1.మీరు నడిచిన పోరు బాట వదలబోమయ్యా
మీరు చేసిన ఆత్మత్యాగం మరువ బోమయ్యా
తెలంగాణా తల్లికోసం వేల జన్మలు కోరుతాం
తెలంగాణా స్వేఛ్ఛకోసం కోట్లమందిమి పోరుతాం

అస్తమించిన అమరులారా! జోహార్ జోహార్
స్వర్గమేగిన యోధులారా అందుకోండి దిల్ సె ప్యార్

2.నూరేళ్ళ జీవితాలు తృణప్రాయం చేసినారు
ముక్కుపచ్చలారకుండగ మృత్యువొడిలో చేరినారు
కరుడుగట్టిన గుండె కూడ కరిగిపోతుంది
మీరు చేసిన ఆత్మబలికి విలువ వస్తుంది
మా కంటివెలుగై కదలినారు కదన రంగంలో
ఇంటింటి దివ్వెగ నిలువగలరు తెలంగాణా చరితలో



వధ్యశిలలపై వంచినాము తలలు- ఉరికొయ్యలకే తగిలించినాము మెడలు
కాలిబూడిదవుటకేన మా ఒడలు- ఎప్పటికిక కరుగుతాయి మీ యెదలు
అడ్డుతగలకండి సైంధవులారా!- అంతతనం చేయకండి ఆంధ్రులారా! సీమాంధ్రులారా!!
1.దేవుడు వరమిచ్చినా పెంచుతారు అంతరాలు- దేవత కరుణించినా కల్పించుతా రవాంతరాలు
నోటుముందటి మాకూటిని ఎత్తగొట్టుతారు- ఇంకాఏమ్మిగిలిందని ఇల్లు కొల్లగొట్టుతారు
దారి వదలిపెట్టండి దాయాదులారా- తలకొరివిగ మారకండి ఆంధ్రసోదరులార
2.కన్నతల్లుల కడుపుకోత కార్చిచ్చై కాల్చుతుంది- దీనార్తుల గుండె కోత తరతరాలు కూల్చుతుంది
తెలంగాణ యువతరక్తం ఉప్పెనై ముంచెత్తుతుంది- విద్యార్థుల ఆక్రోశం ఉరుమై మిన్నంటుతుంది
తెలంగాణ తథ్యమన్నది సత్యమే అయితే- తాత్సారం చేయ తగదు న్యాయమే ఇది అయితే
3.ఎంతమంది కావాలో తెలంగాణాకోరి బలి- ఎప్పటికిక తీరుతుందో (సోనియా ఆకలి) ఆగని ఈ ఘోరకలి
నరమేధం సాగుతోంది నాన్చే ధోరణిలో- అసంఖ్యాక శిరఛ్ఛేద చింతామణిలో
ప్ర్రాణాలతో బేరమాడినా ఫరవాలేదు- నాల్గుకోట్ల తెలంగాణ వెఱవబోదు
4.శ్రీకాంతులెంత మంది తగుల బడి పోవాలో- వేణుసువర్ణలెందరు మంటలపాలవ్వాలో
అమరవీరులారా ఆగదు మన సమరం- మీ బలిదానాలు వృధాకాని పోరాటం
తెలంగాణ ఒక్కటే మన లక్ష్యం- మీ ఆత్మల సాక్షిగా వెలుస్తుంది మన రాష్ట్రం
మన తెలంగాణ రాష్ట్రం జైతెలంగాణా! జై జై తెలంగాణా!!

Thursday, January 14, 2010

జైతెలంగాణా! జై జై తెలంగాణా!!

వెయ్యి చెప్పినా
తెలంగాణ ఇవ్వాలంటాం!
లక్ష చెప్పినా
హైద్రాబాద్ మాదేనంటాం!!

తెలంగాణ జనాలు
హీనమా బఠాణీలు
మర్లబడితే..............
దంతాలు ఫఠేలు!!

ఇరువైపుల పోరలేదు
కురుక్షేత్రంలో
డబుల్ గేం లేదపుడు
ఛాత్రంలో!!

లగడపాటి రాయపాటి
పరిపాటే భేటి!
కుట్రల్లో సదా
ఆంధ్రులే మేటి!!

చిదంబరం
తెచ్చె తెలంగాణ సంబరం!
ఏల కలవరం?
ఔను కల వరం!!

జైతెలంగాణా! జై జై తెలంగాణా!!

గీతం-1
ఖని ఆమె హైమ కన వరం- ఇదిమన తెలంగాణ జిల్లాల వివరం
కొత్తదేది మనలో చేరే అక్కరలేదు- ఉన్న ఈ పదింటిని వదిలే ప్రసక్తిలేదు
1. గోదావరి ప్రాణహితలు మన జలనిధులు
మానేరు శ్రీరాంసాగర్ మన ప్రాజెక్టులు
ప్రత్తివరిపసుపుచెఱకు మనకు పసిడి పంటలు
కొదవలేదు మనకెప్పుడు పాడీపశుసంపదలు
2. సింగరేణి గనులు తెలంగాణ శిరోమణులు
ఎంత తోడినా తరగవు బంకమన్ను నిల్వలు
ఎన్టీపీసి థర్మల్ యునిట్ విద్యుత్ ప్రదాతలు
పేపర్ జిన్నింగ్ రైస్ మిల్సు మనపారి శ్రామికతలు
3. భేషజాలుఎరుగని మాండలీక తెలుగు మనది
రోషాలను ప్రతిఫలించె పోరాట చరిత మనది
వేదాలకు నిలయమిది-జనపదాల కాలయమిది
బతుకమ్మాయనికోరే ఉత్తమ సంస్కృతి మనది
4. భాగవతం రచియించిన పోతన్న పల్లె మనది
శతకాలు పలికిన శేషప్ప ఊరు మనది
జ్ఞానపీఠి గెలిచిన సినారె ఖ్యాతి మనది
ప్రగతి బాట పట్టించిన పీవీజన్మ భూమి మనది
5. రామయ్య వెలిసిన భద్రాద్రి మనది
రాజన్న వెలిగేటి లెములాడ మనది
చదువులమ్మ నెలకొన్న బాసరనే మనది
నర్సన్న కొలువున్న యాదగిరి మనది-ధర్మపురి మనది


6. కొయ్యనే బొమ్మగ మలిచే నిమ్మల మనది
అగ్గిపెట్టెలోపట్టే చీర నేసే సిరిసిల్ల మనది
ఫిలిగ్రీ కళాకృతుల కరినగరం మనది
తివాచీ ప్రసిద్దమైన ఓరుగల్లు మనది
7. శీతల రంజన్ల సృష్టి ఏదులపురి మనది
ఇత్తడి ప్రతిమల స్రష్ఠ పెంబర్తి మనది
ఖద్దరు చేనేతల విఖ్యాతజగతి మనది
బిర్యానంటె నోరూరే హైద్రాబాదు మనది
8. శతావధాని కృష్ణమాచార్య కోరుట్ల మనది
అభినవ పోతన వానమమలై చెన్నూరు మనది
రంగులకల నర్సింగరావు పుట్టిన మట్టిది
కత్తివీరుడు కాంతారావును కన్నపుడమిది
9. సింహమెక్కిన శాతవాహన సామ్రాట్టు దీ నేలనె
శత్రువులకె సింహ స్వప్నం రుద్రమాంబ దీ గడ్డనే
గోల్కొండమంత్రులు అక్కన్నమాదన్నతావిదె
గోండురాజులు కోయదొరలు కొమురంభీముదీమట్టే
10. ప్రజాగాయకు డైనగద్దర్ కదం త్రొక్కె భూమిదే
తెలంగాణ ఊపిరైన కేసియార్ సిద్దిపేటఇచటే
ఉద్యమాల పులిబిడ్డ-విప్లవాల పురిటిగడ్డ
శాంతికి రతనాల వీణ-ఫిరంగియే తెలంగాణ రణాన







గీతం-2
అమ్మా తెలంగాణా! నీకు వందనం!!
అనాధవనుకోకమ్మా-ఉండగ నీ బిడ్డలం
కంటికి రెప్పలాగ కాచుకుంటాము
ఇంటికి అమ్మోరుగా కొలుచుకుంటాము
1. ఎన్నాళ్ళో నైజాము చెఱలోన మగ్గేవు
ఇంకెన్నాళ్ళో పాలోళ్ళ పాలనలో చిక్కేవు
సవితిపోరు అనాదిగా అనుభవించావమ్మా
బాంచనంటు బ్రతుకుతూ నరకం చవి చూసావమ్మా
ఆన తెలంగాణా..మా ప్రతిన తెలంగాణ
పోరు తెలంగాణా..మా గెలుపు తెలంగాణ ||అమ్మా తెలంగాణా||
2. ఆగమై పోయినాము నీ బిడ్డల మిన్నాళ్ళు
అర్భకులం కాదమ్మా అణగద్రొక్క బడినాము
ఒక్కతాటిపైన ఇప్పటికైన నిలిచాము
గొంతెత్తిజై తెలం గాణఅంటు అరిచాము
జై తెలంగాణా జాగో తమ్ములారా
జైజైతెలంగాణా లెండీ రుద్రమ్మలార ||అమ్మా తెలంగాణా|
3. నెత్తురు పారినా పోరాటం సాగిస్తాం
ప్రాణాలొడ్డైనా నిన్ను కాపాడుకొంటాం
నిక్కచ్చిగ మనకంటూ రాష్ట్రం సాధిస్తాము
తెలంగాణ కీర్తినంత జగమంతా చాటుతాము
జై తెలంగాణ జై శాత వాహనులార
జయహో తెలంగాణ జై కాకతీయులార
--------------------------







గీతం-3
జబ్బ చఱచి సాగరా తమ్ముడా!
(తెలంగాణ) ఇజ్జత్కే సవాలిది తమ్ముడా
(అభి) మానమా ప్రాణమా తమ్ముడా
(తెలంగాణమా ప్రాణమా తమ్ముడా)
తెగవేసి తేల్చుకో తమ్ముడా
1. కదంతొక్కి కదలాడు- కదనంలా పోరాడు
గెలుపు నీ లక్ష్యంగా- కడదాకా కలబడు
విజయమో స్వర్గమో వీరుడా
నవోదయం నీదిరా సూర్యుడా
2. ఎన్నాళ్ళీ వివక్షలు-ఎందాక సమీక్షలు
గోటితొ పోయేదానికి-గొడ్డలితో శిక్షలు
సమరమా అమరమా ధీరుడా
చావోరేవో దాటరా నావికుడ
3. సాహసాలు ఉగ్గుపాలు- బలిదానాలోనమాలు
ఉద్యమాల బాటలే-నీకు లాలిపాటలు
తెలంగాణ సాధించర యోధుడా
మడమతిప్పబోకుర అభిమన్యుడా
--------------------------












గీతం-4
ఇనుప బూట్లు తుపాకి బానెట్లు
పొడవలేవు ఉద్యమాని కే తూట్లు
ఏ లాఠీలు గుండెచీల్చుతూటాలు
ఆపలేవు లేవు తెలంగాణ పోరాటాలు
జైతెలంగాణా-జైజై తెలంగాణా
1. దాయాదులమైనామా సొంత ఇంటిలోనే
బిచ్చమెత్తుకోవాలా-హక్కులున్నచోటనే
ప్రజాస్వామ్య భారతంలొ-రెండోజాతి పౌరులమా
తెలంగాణ ప్రజలమంటె-భారతీయిలం కాదా
ఎందుకీ వివక్షా-సహనానికేనా పరీక్షా
2. విద్యార్థులలో కూడ మీ పిల్లలు ఉన్నారు
విచక్షణారహితంగా ఎందుకు కొడుతున్నారు
వైద్యులూ రోగులూ మందొకటే కోరుతుంటె
తెలంగాణ ఇచ్చుటనే అందరుఆశించుతుంటె
ఎందుకీ రాజకీయం-ఎందుకుదొంగాటకీయం
3. నానబెడితె శనగలైన-ఉబ్బిపోవునని తెలియద
తాత్సారం చేస్తుంటే – రక్తమేరులైపారద
ప్రత్యేక తెలంగాణ – అనివార్యంఅనివార్యం
ప్రభుత కళ్లు తెఱవకుంటె-ఇది క్రౌర్యం కడు ఘోరం
ఎప్పుడాగిపోతుంది మారణహోమం
ఏంచేస్తె ఇస్తారో తెలంగాణం
--------------------------






గీతం-5

బందులతో ఇబ్బందులు ఒకనాటివేగా
చెఱసాలలు ఉరికొయ్యలు ఇట అలవాటేగా
నరమేధాల్లో నలిగిన చరితే తెలంగాణా
బలిదానాల్లో వెలిగిన ఘనతే తెలంగాణా
1. పోరాడితే పోయేదేమి ప్రాణం మినహా
సాగించరా సమరం నేడు సరికొత్త తరహా
నిరాహార దీక్షలతో నీ నిరసనలు
సత్యాగ్రహాలతో ఆక్షేపణలు
నీ మౌన దీక్షలతో అభ్యర్థనలు
సమ్మెలు,ధర్నాలతో ఆకాంక్షలు
2. అణగారిన భావం నీలో పాతాళ గంగ
దాహాలనే తీర్చేయగా తరుణమిదే ఉప్పొంగ
మేధావులందరూ చేయి చేయి కలుపంగ
యువకులంత ముందు నిలిచి ఉద్యమాలు నడపంగ
వచ్చితీరు తెలంగాణ ప్రత్యేకంగా
ఇచ్చితీరుతుంది ప్రభుత సాదరంగ
--------------------------










గీతం-6


ఒకే గానం అందరినోట-తెలంగాణం-తెలంగాణం
ఒకేప్రాణం అందరిలోనా-తెలంగాణం-తెలంగాణం
అణగారిన తెలంగాణ అన్నలారా!
మసిబారిన తెలంగాణ తమ్ములారా!!
ఒకటే వాదం తెలంగాణం-మనదొకటే నాదం తెలంగాణం
జైతెలంగాణా!-జైజై తెలంగాణా!!
1. చీకటి కుహరాలు చీల్చుకొని రారండి
ఆశల దీపాలు వెలిగించుకతెండి
మీ బిడియపు శృంఖలాలు ఇకనైనాత్రెంచుకొండి
నిర్లిప్తపు పంజరాలు ఛేదించుక రారండి
2. హీనంగా బాంఛన్ కాల్మొక్తమని అన్నారు
తరతరాలు ఏదో ఒక పీడనలో ఉన్నారు
పనిచాతకాదని తెలివసలే లేదని
అభాండాలనెన్నెన్నో తలమోసి ఉన్నారు
3. అసువులు బాసారు అమాయకులు ఎందరో
ఆత్మార్పణ చేసారు యువకులెందరెందరో
ఎవరికొఱకు సాగుతోంది ఈ దమన కాండ
ప్రతిఒక్కరు నిలవాలి ఉద్యమానికే అండ
తెలంగాణ ఉద్యమానికే అండ
జైతెలంగాణా!-జైజై తెలంగాణా!!
--------------------------





గీతం-7

కసాయి కఱకు పాలన
కబంధ హస్తాల్లొ తెలంగాణా
నైజాము రజాకార్ల జమాన
కళ్ళముందు కదులుతున్న భావన
1. ఏ రాజ్యాంగంలోనిదీ అధికరణ
ప్రజలమనోభావాల ధిక్కరణ
“ ప్రజలకొఱకు ప్రజలచే ప్రజలు ” అనే
మరిచారా ప్రజాస్వామ్య వివరణ
2. దిక్కులేనివయ్యాయి ప్రాథమిక హక్కులు
నడకసాగనీయకుండ ఎన్నెన్ని చిక్కులు
శాంతి స్వేఛ్చలకే కడితే సమాధులు
నిరంకుశత్వానికి ఉండవుగా పుట్టగతులు
3. తిరుగుబాట్లు కావుకదా ఈఉద్యమాలు
ప్రజాకాంక్ష తెలుపుకొనుటకీ సాధనాలు
గదిలొపెట్టినోరుకట్టి కొట్టె ఈ వైనాలు
పులిగమారి పిల్లైనా తీయదా ప్రాణాలు
--------------------------










గీతం-8

రగులుతోంది తెలంగాణా
ప్రతిగుండె ఆరిపోని రావణకాష్ఠంలా
పారుతోంది నెత్తురే వరదలా
నరనరాన ఉరకలెత్తె గంగాప్రవాహంలా
సాగుతోంది ఉద్యమం-సత్యాగ్రహాలతో
అంతిమపోరేయనే కనని వినని బాటలో
1. లాగివేయడానికి దిక్కులేని శవాలా
విద్యార్థులంటేనే అనాధలనుకోవాలా
న్యాయమైన ఆకాంక్షలు మానుకోవాలా
ఆటవికుల రాజ్యమని భావించాలా
2. వీలైతే సమర్థించు నిజాయితీగ ఉద్యమాన్ని
చేతనైతె ఎఱుక పఱచు నీ సంఘీభావాన్ని
నీచమైన యోచనతో నీరుగార్చబోకురా
కుటిలమైన రీతిలో కూల్చివేయబోకురా
3. నోటిముందు కూటిని త్రోసివేయ న్యాయమా
వెన్నుపోటుపొడుచుటకై కాలుదువ్వ ధర్మమా
ఇన్నాళ్ళు లేని బాధ ఇప్పుడె మీకనిపిస్తోంది
తెలంగాణ అన్నప్పుడె ఉలుకు మీకు పుడుతోంది
తెలంగాణ అన్నప్పుడె సమైక్య రాగమొస్తోంది
ఆంధ్రా కోస్తా రాయలసీమ ప్రత్యేకత నిన దిస్తోంది
హాస్యాస్పదంగా ప్రత్యేక హైద్రా బాధని వినిపిస్తోంది
--------------------------





గీతం-9

కలిసి ఉంటే కలదా సుఖము
బతుకంతా కన్నీటి పర్యంతము
కలో గంజో తాగిన నయము
వేరు బడితె దక్కుతుంది ఆత్మ గౌరవం-తెలంగాణ ఆత్మగౌరవం
1. వేరెవరైనా తెలుగువాడి వైపు
వేలు చూపినా చేయిచేయి కలుపు
సాటి ఆంధ్రుడే నిన్ను మంటగలుపు
ఆ క్షణమే కదా వేర్పాటునుసిగొలుపు
ఇంటికే పెద్దన్న తమ్ముల వంచించ తగున
కంచే చేనుమేస్తే పంట ఇంక మిగులునా
2. ఎందుకు పాండవులు ఐదూళ్ళనడిగారు
మోచేతి నీళ్లు వాళ్ళు తాగలేక
పీడిత దేశాలెందుకు స్వాతంత్ర్యం కోరాయి
బానిస దుర్భర బ్రతుకులు మోసాయి గనక
అయిన వారికి ఆకుల్లోన కానివారికి కంచాల్లోన
వడ్డించేది మనోడేకద ఉంచాలెందుకు పస్తుల్లోన
వడ్డించినా అడుగులో బొడుగులో ఎంగిళ్ళేనా
3. నక్కలు వేదాలను వల్లిస్తే నమ్మాలా
తోడేళ్ళు ధర్మాలు చెబితె పాటించాలా
దొరికినంతదోచుకొంటు-భూకబ్జాల్జేసుకొంటు
తెల్లవాడి తరహాలో ఏకై వచ్చి మేకనిపిస్తు
అంటారు కలిసి ఉంటె కలదు సుఖమని
చెపుతారు విడిపోవుట అవసరమా అని
--------------------------




గీతం-10
భిన్నత్వంలో ఏకత్వం మన తత్వం
’ సంసారం ఒక చదరంగం ’ - చలన చిత్రమే మనకాదర్శం
కలతలున్న కాపురాలు-కలిసి కొనసాగ సాగలేవు
విరిగిపొయ్న మనసులతో-మనుగడ సాగించలేవు
వెయ్యేళ్ళకైనా తప్పదుగా వేరు కుంపటి
నూరేళ్ళకైనా అనివార్యం చావు మనిషికి
1. భరతావని ఒక మహాభవనము - అందులోనె మన సహజీవనము
భారతీయతే మనగోత్రం - భరతునిదే మన వంశం
గృహమొక్కటే అయినా - గదులు విడిగా ఉండవ
కుటుంబమొక్కటే అయినా - వాటాలు వేరై ఉండవ
రాష్ట్రాలు వేరైనా ఒకటే మన జాతీయత
విడివిడిగా ఉన్నాగాని చెదరదుగా మన సమైక్యత
2. చిన్ననాడు కలిసున్నామని - కడదాకా కుదరదుగా
ఎవరిబ్రతుకు వారే బ్రతికే - రోజొక్కటి తప్పదుగా
కవలలైతె మాత్రము - చేయగలమ కలిసికాపురం
తెలుగుభాష ప్రసక్తి వస్తే - ఒకటేకద ఎప్పుడు మనము
కడుపులోన లేనిది కావలించుకుంటేరాదు
దిగమ్రింగకతప్పదు నిజము- అనిపించినా చేదు
3. వేరువేరు అంటే ఎందుకు- వ్యధను చెందడం
వేనవేనవేర్ల తోనే -ఎదుగగలుగు మహావృక్షము
పదిలపఱచు మదిలోన - అనుభూతుల పొదరిల్లు
భారమైనా తప్పదు అన్నా-విభజన ఇక వాటిల్లు
పరుగెత్తే ప్రగతే నీది ఆంధ్ర సోదరా
నడకనేర్చుకుంటాము –నీ చేయి వదలరా
4. మనదైన ఉమ్మడి ఆస్తికి - మెరుగులెన్నొ దిద్దానన్నావ్
నీవసతి సౌకర్యాలకె – హంగులెన్నొ కూర్చుకున్నావ్
వదులురోజు మమకారాన్ని – వదులుకోకతప్పదుగా
అనుభవించినంతకాలం – హాయిని పొందావుగా
బ్రతుకనేర్చి ఉన్నావు నీకేం లోటు
హుందాగా మసలుకొంటే ఇస్తాము మా ఎదలో చోటు
--------------------------
గీతం-11
సమైక్యాంధ్ర వాదనలో –ఎక్కడుందినిజాయితి
కనబడుతూనే ఉన్నది ఊసరవెల్లుల సంగతి
ఒళ్లుకాలి ఒకడేడుస్తుంటే-ఇల్లుకూడ తగలబెట్టురీతి
1. ప్రత్యేక తెలంగాణ -మ్రింగుడు పడలేక
జై ఆంధ్రా రాయలసీమ అనిబయటకు అనలేక
పూటకో వ్యాఖ్యతో-గంటకో లక్ష్యంతో
తికమక పడుతున్నారు-కక్కలేక మ్రింగలేక
2. అసలుబాధ ఉన్నదంత హైదరాబాదేరా
అందుకే అవుతున్నారు గాబరగాబరా
ఇంతచిన్న సంగతి ఎవరైనా ఎరుగరా
ఎదుటివాడి గుండెకాయ అడిగితే తప్పురా
3. దేశమంతమనదేకద -ఎక్కడైన బ్రతకవచ్చు
ఉద్యోగవ్యాపారాలు-అందరు చేసు కోవచ్చు
వచ్చినోళ్ళు మెల్లెగా- చాపక్రింద నీళ్ళుతెచ్చు
అప్పుడే రేగుతుంది-స్థానికుల్లొ చిచ్చు
4. పార్టీలుమాయమై –ప్రాంతీయత వెల్లివిరిసె
సిసలైన రాజకీయ-మిపుడేకద మనకు తెలిసె
వద్దని వదిలించబోతె -గుదిబండగ ఉంటారట
అన్నమాటవినకుంటే- హానికితలబడతారట
--------------------------











గీతం-12
నమ్మబోకు తమ్ముడ యే కల్లబొల్లి మాట
వెలువడాలి ప్రత్యేక తెలంగాణ ప్రకటన
పార్లమెంటు భవనమే ప్రత్యక్ష సాక్షిగ
ఉత్తర్వులు రావాలి ఉన్నఫళంగా
1. కసరత్తులు చురకత్తులు -కమిటీలు బూటకములు
వెన్నుపోట్లె అలవాట్లు-వంచనలే రివాజులు
అరచేతిలొ చూపగలరు వైకుంఠాలు
బొందితోనె చేర్చగలరు ...స్వర్గాలు
2. అందితే జుట్టు అందకుంటె కాళ్లు- అవకాశవాద రాజకీయాలు
ఏరుదాటగానే తెప్పను తగలెయ్యడాలు
కంటితుడుపు మాటలు-ఎదలొ కుటిల రీతులు
కబుర్లతోనే కాలం కరుగదియ్యడాలు
--------------------------
















గీతం-13
ఇల్లేకద అలికినాము ఇప్పుడు
పండుగకై చేయాలి చడీ చప్పుడు-సందడి ఎప్పుడు
తెలంగాణయను ఢిల్లీ ఉన్నది బహుదూరంగా
వడివడిగా అడుగులేసి చేరాలీ సత్వరంగా
1. ఏప్రయోజనాలు -దెబ్బతినకుండ
ప్రజలమనో భావాలు-గాయపడకుండ
మధించాలి మేధావులు పాలకబంధం (కబంధం=కడలి)
అందించాలి తెలంగాణ అమృతభాండం
2. మోసినారు మంధరగిరి ఉద్యమకారులు
మ్రింగినారు హాలాహలం అమరవీరులు
కల్పవృక్షాదులకై ఎగబడతారసురులు
కంటకనిపెట్టాలి-కలరు రాహుకేతువులు
3. అడ్డు తగులుతుంటారు ఎందరో సైంధవులు
ముందడుగే వేయనీరు అడుగడుగున శిఖండులు
ఆరంభశూరత్వం కాకూడదు వీరత్వం
కలసాకారమైన అపుడేకద సంబరం-కడలేనీ సంబరం













గీతం-14
దున్నపోతు ఈనుతుంది మీ మాటల్లో
నోరు నొసలు వేరువేరు-మీ వ్యక్తీ కరణల్లో
పులుముకొన్న చిరునవ్వులు-మీ మొహాలలో
అణువణువు విషమేకద-మీ దేహాలలో
1. హైద్రాబాద్ లోనఎలా -తెలంగాణ ఆంధ్రలు
వస్తే గెలిపిస్తారా-ఆంధ్రకి మా నేతలు
విడ్డూరాలకైనా- ఉండవా హద్దులు
తెలంగాణ వాళ్ళు కాదు-గొర్రెలు ఎద్దులు
2. ఆస్తులిచట లేవంటూ -ఎందుకింత రాద్ధాంతం
అన్నదమ్ములంటూనే-ఎందుకు భీతావహం
నదీజలాలొదరనే-కదా మీ అనుమానం
మిగిలిన మా నీళ్ళన్నీ-మీకే మా బహుమానం
3. ఆంగ్లేయుల పాలనలో-ఆరితేరినారు మీరు
సావాసదోషంలో-తెల్లవారుగ మీరైనారు
కుటిలనీతులెన్నెన్నో-వొంటబట్టించినారు
కార్యాన్ని సాధించగ-ఎంతకైన దిగజారుతారు
--------------------------












గీతం-15

కౌటిల్యతుల్యులైన ఆంధ్రులారా
ధృతరాష్ట్ర ప్రేమచూపు దాయాదులారా
వద్దువద్దు మాకింకా మీతో సహజీవనం
మమ్ము మా మానాన-బ్రతకనిస్తె ముదావహం
1. జలగలై ఎన్నాళ్ళు పట్టి పీడిస్తారు
నల్లులవలె నెత్తురెంత కుట్టి పీలుస్తారు
పరాన్నబుక్కులై ఎంతకాలముంటారు
కల్లబొల్లిప్రేమలెలా-కనబర్చ గలుగుతారు
2. బంధమంటె ఇరుమనసులు ఒకటిగ కలవాలికదా
స్నేహాన్ని ఎదుటివారు ఒప్పుకోవాలికదా
ఏకపక్ష ప్రేమలు ఎంత హాస్యాస్పదాలు
వద్దన్న వనితనే వేధించు చందాలు
3. తెలంగాణీయులు-ఒకరైనా మిము కోరారా
పక్కలోన బళ్లెంలా - భావించకున్నారా
మీకుమీరె తీర్పులిస్తే - అమలుజరిగిపోతుందా
సమైక్యమని వల్లిస్తే - పబ్బం గడిచి పోతుందా
--------------------------











గీతం-16

ప్రజ్వలించె జ్వాలలకు -బాధ్యులెవ్వరు
రగులుతున్న గుండెలకు -కర్తలెవ్వరు
రేగుతున్న ఆశాంతికీ -నిర్ణేతలెవ్వరు
నోటి ముందటి బుక్కను-ఎత్తగొట్టిందెవ్వరు
1. దశాబ్దాలుగ తెలంగాణ-నణగద్రొక్కిందెవ్వరు
సమైక్యాంధ్ర పేరు చెప్పి- చిచ్చు పెట్టిందెవ్వరు
మాటతప్పి మడమతిప్పి-తోకముడిచిందెవ్వరు
కాలి బ్రతుకులు బూడిదైతె-చోద్యమును చూస్తున్నదెవ్వరు
2. రాజ్యాంగం స్పష్టపఱచినా-రచ్చకీడ్చిందెవ్వరు
ప్రజలు తెలంగాణమన్నా-దాటవేస్తున్నదెవ్వరు
ఆడలేక మద్దెల ఓడు- అంటున్నదెవ్వరు
ఏకాభిప్ర్రాయమెలికతో-చేతులెత్తేసిందెవ్వరు
3. వద్దన్న ఆలితో-సంసారం బలాత్కారమే
కాదన్న వారితో-మనుగడ ప్రశ్నార్థకమే
ఒళ్ళంతా కంపరమైతె-కలయిక కల ఇకనే
మనసులంటు విరిగిపోతే-చెలిమి యిక దుస్సాధ్యమే
4. పాలివారి ఆస్తిని-పంచిమా కిమ్మనలేదు
పక్కవారి నిధులేవి-దోచుకొంటామనలేదు
ఉన్నవారినెవ్వరినీ-వదిలి పొమ్మనలేదు
(మా)తెలంగాణ మాకిస్తే-మీ సొమ్ముపొయ్యేది లేదు
--------------------------









గీతం-17

ఒక్కరు కాదు ఉద్యమమంటే ఉప్పెనరా అది
ఓటమికాదు ఓరిమి అంటే సునామి అవుతుంది
సమిధలు జ్వలియిస్తెనే యజ్ఞం ఫలమిస్తుంది
త్యాగాలకు తలపడితేనే తెలంగాణ వస్తుంది
జై తెలంగాణా జయహో తెలంగాణా
1. తరుణం మనకిది -తప్పని రణమిది -తగ్గకు వెనకడుగేసి
మనుగడ కోసం -చేసే రగడిది - మరలకు వెన్నుచూపి
పిడికిలి బిగియిస్తేనే సంసిద్ధత తెసిసేది
పిడుగులు కురిపిస్తేనే యోధత్వం గెలిచేది
2. మరణం మనిషికి- ఎప్పటికైనా- తప్పనిదే కదా
ప్రాణం పోరుకు -ధారపోస్తే –విలువొస్తుందిగా
ఆత్మహత్యలెన్నటికీ హర్షణీయమే కాదు
సమరంలో అమరులమైనా చిరంజీవులౌతాము
3. స్వాతంత్ర్యానికి చేసారెందరొ బలిదానాలు
స్వేఛ్చా వాయువు పీల్చుటకొఱకే ఊపిరులొదిలారు
ఒక్కమాట పైననే దేశీయులు నిలిచారు
చిత్తశుద్దితోడనే లక్ష్యం సాధించారు
4. గాంధీ మార్గం -అనితర సాధ్యం-తోకముడిచాడు తెల్లవాడు
సత్యాగ్రహమే-ఉద్యమ సూత్రం-వాడిగెలిచాడు మహాత్ముడు
స్పూర్తితో సాగించు చివరి పోరాటం
నేర్పుతో సాధించు తెలంగాణ రాష్ట్రం
--------------------------








గీతం-18

మా గుండె ఒక్కటే- మా మనసు ఒక్కటే
మా మాట ఒక్కటే- మా బాట ఒక్కటే
జై తెలంగాణ- జైతెలంగాణ
1. రంగురంగుల-అంగీలు తొడిగినా
రకరకమ్ముల- దుస్తులు వేసినా
పలువిధమ్ముల-పక్షాలు కలిగినా
వేరువేరుగ-మార్గాల సాగినా
మా కాంక్షఒక్కటే-తెలంగాణా
మా లక్ష్యమొక్కటే-తెలంగాణా
2. మాలొ మేముగా-వాదించుకొన్నను
వ్యక్తిగతంగా-భేదించుకొన్నను
భావసారూప్యత-లోపించి యున్నను
భిన్నమైన ధృవాలని-తలపించుచున్నను
మా వాదమొక్కటే-తెలంగాణా
నినాదమొక్కటే-తెలంగాణా











గీతం-19

పదేపది జిల్లాలు తెలంగాణలో...మన తెలంగాణలో
పదేపదే ఉత్తేజాలు హృదయాలలో..మన హృదయాలలో
ఇదే అదను మేల్కొనగ గ్రామగ్రామం
మేధపదును పెట్టి నడుపు సంగ్రామం
తెలంగాణ వీరుడా!విద్యార్థి తమ్ముడా!!
జై తెలంగాణా!జై జై తెలంగాణా!!
1. తలపండిన భీష్ములను -శిఖండితో గెలవాలి
ద్రోణులనిర్వీర్యులజేయ-బొంకులైన పలకాలి
అలంబసులనెదిరించగ ఘటోత్కచులు కావాలి
కర్ణులను కడతేర్చగ కుట్రలైన చేయాలి
2. గీతోపదేశాన్ని -మరవబోకు ఎన్నడు
పరమశివుడె ఎదురైనా –వెన్నుచూపకెప్పుడు
అర్జునుడై గర్జించు..దుర్జనులను నిర్జించు
పద్మవ్యూహాలున్నా-వరుసబెట్టి ఛేదించు
3. పోరాటానికొకే లక్ష్యం-అదే కదా విజయం
అభిమన్యులకోల్పోయిన -సంయమనం పాటించు
తెలంగాణ సాధనే -ఈ భారతయుధ్ధం
చేయవోయి పార్థుడా-పాశుపతం సంసిధ్ధం










గీతం-20


పోరాట పటిమ నీదే- త్యాగాల ఘనత నీదే
ఓ ఉద్యమ కారుడా- తెలంగాణ వీరుడా
జై తెలంగాణా!జైజై తెలంగాణా
1. నివురు గప్పి ఉన్ననీవు-ఆరిపోని నిప్పేగా
అణిగిమణిగి ఉన్ననీవు-నిజమైన ఉప్పెన
నీగుండె బ్రద్దలైతె-పెల్లుబుకును లావా
గొంతెత్తి గర్జిస్తే-భూ కంపాలు రావా
గల్లీ నుండి డిల్లీవరకు-పీఠాలు కదిలి పోవా
జై తెలంగాణా!జైజై తెలంగాణా
2. ఆశయాల సాధనకై -అసువులైన తృణప్రాయం
కాలమెంత గడిచినా –మానకుంది నీ గాయం
ఇకనైనా తెలియజెప్పు-ప్రభుత కొక్క గుణపాఠం
తెలంగాణ తథ్యమన్న-తిరుగులేని నగ్నసత్యం
సత్వరంగ తెలంగాణ ఇవ్వాలన్న సందేశం
జై తెలంగాణా!జైజై తెలంగాణా











గీతం-21

అనుసరించు ఈ మార్గాలు-నిరసన ప్రకటనకు
పాటించు ఈ ధర్మాలు-శాంతియుత పోరుకు
అందరి గమ్యం తెలంగాణా-అంతిమ లక్ష్యం తెలంగాణా
1. లూఠీలు దహనాలు-కావు హర్షణీయాలు
రాస్తారోకొ బందులు-ముందరి కాళ్ల బంధాలు
దాడులు ధ్వంసాలెలా-సమర్థనీయాలు
ఆత్మహత్యలెప్పుడూ-తేవు పరిష్కారాలు
2. ప్రతి విధ్వంసం-ప్రజలకే బహు నష్టం
పన్నులు ధరలు-పెరిగేది సుస్పష్టం
కాకూడదెవ్వరికీ-కంటగింపు మన ఇష్టం
ఈ సంగతి మఱచి పోతె-ఎంతటి దురదృష్టం
3. సత్యాగ్రహములు-అహింసాధోరణులు
తెచ్చిపెట్టాయి-స్వేఛ్ఛాస్వాతంత్ర్యాలు
గాంధేయ వాదములు-సర్వులకామోదములు
తిరుగులేని శస్త్రాలవి-మనకు బ్రహ్మాస్త్రములు
4. నిరశన దీక్షలు-మౌనప్రకటనలు
మానవ హారాలు-నలుపురంగు ధారణలు
కలవుకలవుఎన్నెన్నో-కొంగ్రొత్త రీతులు
ఆవిష్కరించునీవు-విన్నూతన తెన్నులు
5. మన నినాదాల హోరు-దేశమంత మ్రోగాలి
గొంతులన్ని ఒక్కటవ్వ-ఢిల్లీయే వణకాలి
కదంత్రొక్కి అడుగులేయ-భూకంపం రావాలి
కోట్లమంది కోర్కె తెలంగాణయని తెలపాలి





గీతం-22
రాష్ట్రం సాధించకుంటే –మననోట్లో మన్నేరా
పాలన మనదవకుంటే-బానిసోల్ల బతుకేరా
తెలంగాణ తమ్ముడా-తెగువజూపి పోరాడు
తెగేదాక లాగేద్దాం-చీకిపోయింది తాడు
1. ఎన్నాళ్ళని భరిస్తాము-దగాకోరు నాటకాలు
ఎన్నేళ్ళని సహిస్తాము-వంచనలు కుత్సితాలు
ఒకటారెండా ఎన్నెన్నని-వెంచగలము
దశాబ్దాలు గడచినా-ఎంతని మన్నించగలము
ఎన్నైనా చెప్పగలము సుస్పష్ట తార్కాణాలు
ఎన్నైనా చూపగలము నిర్దుష్ట నిదర్శనాలు
2. వద్దువద్దని నెహ్రూ –వాదించినాగాని
మాయచేసి కలిపారు ఆంధ్రులతో ఆనాడు
పడనినాడెప్పుదైన విడిపోవుట సబబని
తేల్చిచెప్పినాడు-క్రాంతదర్శి జవహరుడు
కలతలతోఎన్నాళ్ళు -చేయాలి కాపురాలు
కూలిపోకతప్పదుఇక –శిథిలమాయె గోపురాలు
3. పెద్దమనుషులొప్పందం-కాలరాచినారు
ముల్కీనిబంధనలు-తుంగలోతొక్కినారు
ప్రభుత ఉత్తర్వులన్ని-అటకలెక్కించినారు
సర్వోన్నత తీర్పులన్ని-బేఖాతరు చేసారు
ఇంతకన్న ఏముంటుంది-వివక్ష అంటే
పగలబడి నవ్వొస్తుంది-సమైక్యమంటే
4. ఎవరికేది లాభమో-దాన్నివారు కోరుతారు
అతితెలివిగ ఆంధ్రులెపుడు-మన యింట్లో చొర్రుతారు
ఎవరింట్లో వారుంటే-అందరికీ సంక్షేమం
కలోగంజోతాగినా-అదియేకద ఆనందం
మాటవేరు మనసువేరు-తినేతిండి తీరువేరు
దృష్టివేరు స్థాయివేరు-పండుగ పబ్బాలువేరు
--------------------------
గీతం-23

పుట్టుకతోనే ఉద్యమకారులు పుట్టుక రారయ్యా
తల్లి కడుపులోనుండే నడుములు బిగించి రారయ్యా
ఇల్లు తగలబడి ఒకరు-కడుపులొ కాలి ఇంకొకరు
ఎగబడతారు దిక్కు తోచక-తెగబడతారు ఆకలి తీరక
జై తెలంగాణ! జై జై తెలంగాణా!!
1. చలిచీమలనిఎంచి నలిపివేస్తుంటే-
తప్పదు చావు ఎంతటి సర్పానికైనా
నయవంచనలెప్పూడూ పెంచిపోషిస్తుంటే-
తిరబడి రక్కుతుంది సాదుకునే పిల్లైనా
తయారుచేయకు –సాధనాలనే-మారణాయుధాలుగా
మార్చివేయకూ-శాంతివనాలనే- స్మశానాలుగా
2. మానవత్వమంటూనే పెడుతున్న ఈ మంటలు-
ఎలా రేపకుంటాయి ఈర్ష్యాద్వేషాగ్నులు
సౌభ్రాతృత్వమనే ముసుగుతో దొపిడీలు-
చెప్పకనే చెబుతాయి ఎదలోని కల్మషాలు
కలిసిఉండి అనుక్షణం- కలహించ భావ్యమా
విడివిడిగా ఉండి కూడ-ఆత్మీయత పంచుకోమ
3. ఎదుటివాడి కడుపుకొట్టి-ఏం బావుకొంటారు-
పక్కవాడి నోరు నొక్కి-గొంతు చించు కొంటారు
కూడబెట్తుకున్న ఆస్తి కడదాకా వెంటరాదు-
మేడపైన మేడలేల ఆరడుగుల నేల చాల
ఇకనైనా కళ్ళు తెఱచి దారికాస్త వదలరాద-
తెలంగాణ సాధనకై చేయూత నీయరాద






గీతం-24

రాయబారాలు తగవు-బేరసారాలు తగవు
మీనమేషాలు తగవు-తక్షణ కర్తవ్యం ఒకటే తగవు
తెలంగాణ యువకుడా –తాత్సారాలు తగవు
విద్యార్థి తమ్ముడా-ఉద్యమాల చరిత్రలకు నీవేలే ఆద్యుడవు
1. చింతకాయలే రాలే మంత్రాలు వెయ్యాలి
దెయ్యాన్ని వదిలించగ చెప్పులనే వాడాలి
మంచిగ చెబితే వింటున్నార ఎవరైనా
గుణపాఠం నేర్పించగ నడుంకట్టు ఇకనైనా
2. అమ్మపాలు తాగి రొమ్ముగుద్దకూడదు
తిన్న ఇంటి వాసాలు లెక్కించకూడదు
ఆంధ్రవలసవారంతా జై కొట్టితీరాలి
తెలంగాణ తల్లికి తలలు వంచి మొక్కాలి
3. రోమ్ లో ఉండేవాళ్ళు రోమన్ లాకావాలి
క్షేమాన్ని కోరుకొని మనతొ మమేకమవ్వాలి
తమకోసం శ్రమవలదని ఆంధ్రులకి చెప్పాలి
తమకోసం భయమొద్దని ఆంధ్రులకి చెప్పాలి
సమైక్యవాదమింక సంక నాకి పోవాలి
4. స్థిరపడిన ప్రజలంతా ఆంధ్ర సంగతి మరవాలి
తెలంగాణ బిడ్డలమని కలలొకూడ తలవాలి
ఉద్యమాన పాల్గొని సంఘీభావం చాటాలి
జైతెలంగాణ అంటు గొంతెత్తీ పాడాలి






గీతం-25



గొంగళిలో తింటూ-ఏరబోకు వెంట్రుకలు
మురుగుకాలవలో ఉంటూ-మూసుకోకు నాసికను
రాజకీయనాయకుడా!అమాయకుల మాయకుడా!!
పార్టీ ఏదైనా నీవే ఒక బూటకం-గమనిస్తున్నారు ప్రజలు నీ వింత నాటకం
1. నరంలేని నాలుకనీది-స్థిరమేది నీవెన్నెముకకి
మాట నిలకడేలేదు-ఎప్పటికీ కప్పదాటు
ఊసరవెల్లే నీకంటే ఎతెంతో నయం నయం
గుంటనక్కే ఎఱుగదు నీ మాయోపాయం
2. పదిమందితో తిరిగి –పతివ్రతల ఫోజులు
నిజాయితీ జాడలేని-నికృష్టపు రీతులు
ఎంచగలవు ఎప్పుడు-ఎదుటిపార్టీ తప్పులు
గ్రహించలేవు తొడిగావని-నీవవే చెప్పులు
3. తెలంగాణ కోరుకుంటె-పార్టీలు వదిలిపెట్టు
సభ్యునిగా సైతం-రాజీనామాను పెట్టు
ఉద్యమాన ముందునిలిచి త్యాగాలకు తలపడు
తల్లి ఋణం కాస్తైనా-తీర్చుకొనగ త్వరపడు






గీతం-26

నువ్వు నాకు వద్దు-ఈ పొద్దు
దాటినావు హద్దు –తాకొద్దు
చేసినాను రద్దు-మనపద్దు
చేయకుంటె ముద్దు-ఏ సద్దు
1. ఏమిటి ఈ నిత్య ఘర్షణ
తాత్కాలిక ఆకర్షణ
అవసరమే లేదు ఏ వివరణ
ఉండబోదు ఇంక ఏ సవరణ
2. అర్థమైతె చాలు నా మనసు
కాకూడదు కంటిలోని నలుసు
తెలిసింది నిమ్మకాయ పులుసు
రాలిపోకతప్పదు పైపై పొలుసు
3. తెలివైన వారికి చాలు సైగలు
పెడితెచాలు పొమ్మన్నట్టె పొగలు
హర్షణీయమే కాదు పగలు
రాజుకోనీయకు ఎదలో సెగలు

గీతం-27


సమరానికి చరమగీతం- ప్రగతికి ఇక సుప్రభాతం
తెలంగాణ సాధించిన జనగీతం
చిరకాల స్వప్నాల సాకారగీతం
జయగీతం-విజయగీతం- తెలంగాణ తల్లికి-ప్రణమామ్యహం
జైతెలంగాణా! జయహో తెలంగాణా!!
1. కలిసిఉంటె-కలదు సుఖము-ఇది స్పష్టం
ఐకమత్యమే- బలమన్నది-అక్షర సత్యం
స్పర్దతే వర్దయా విద్యా అనుసూక్తీ ఒకటుంది
పోటీ ఒకటుంటేనే-మన పటిమను-చాటుతుంది
2. భారతీయులుగ మనం ఒకటిగానె ఉందాం
దాక్షిణాత్యులుగా మన ఐక్యత తెలుపుదాం
తెలుగువాణి ఎల్లప్పుడు గర్వంగా వినిపిద్దాం
తెలంగాణ ఆంధ్రా రాష్ట్రాల్లో జీవిద్దాం
3. మనుషులుగా మనమెప్పుడు- మానవతను బ్రతికిద్దాం
ప్రాణమున్నజాతిగా -జీవ కరుణ చూపుదాం
బుద్దిజీవులైనందుకు పర్యావరణం కాచుదాం
విశ్వజనీన మైనదైన -ప్రేమను కనబఱచుదాం



జైతెలంగాణా! జై జై తెలంగాణా!!